كارلا حداد: "ولّعوا دواليب قلتوا مش كلاس.. رقصوا اتهموتهن بالفجور"

في رسالةٍ طويلة نشرتها عبر حساباتها على مواقع التواصل الإجتماعي، رفضت الإعلامية كارلا حداد إتهام التظاهرات في لبنان بالمؤامرة الخارجية قائلةً "لبنان توحّد وانتفض ومطالب المتظاهرين كتيرة ومش محصورة ودقيقة وهيدا دليل انها مظاهرة عفوية مش مؤامرة خارجية منظمة ومدسوسة متل ما جرّب الفريق التبعي والحزبي يقنعنا".

وأعربت كارلا حداد عن إمتعاضها من إنتقاد البعض لما يحدث في الإحتجاجات بالقول "هي صرخة من القلب والناس سبّت وقالت حكي عيب ينقال واكيد انا ضد التعرّض للكرامات بس لمّا الواحد يفقد أعصابه ما بسيطر عكلامه عذرن معن سامحوهن منن كلاس! تسكّرت طرقات، ولّعوا دواليب وقفت اشغالنا عرقلولنا حياتنا وقعّدوا ولادنا بالبيوت وما اسما مظاهرة! انتفاضة! كيف بدكن تكون فسرولي!".

وأضافت "الثورة هي الخروج عن الواقع باندفاع يحرّكه عدم الرضا أو حتى الغضب (تكسير، توليع، ألفاظ نابية...)، وقّفوا توليع وتكسير واحتجاج ورقصوا وغنّوا وخلّوا العالم كله يشوفن ويتماتل فين بس كمان الفئة المزعوجة ما عجبها واتهموهن بالفجور".

كما رفعت كارلا حداد شعار "كلّن يعني كلّن"، فكتبت "بعدين شعار كلّن يعني كلّن ما عم بفهم ليه زاعج فئة ومستنفرين يدافعوا. يا حبايب قلبي كلن يعني الكل مش غيرن وهني لاء، كلن يعني مش بس هني يعني الكل، يللي استلم الحكم من بعد بشير الجميّل لهلّق هول هني كلن هلّق مين سرق اكتر مين اقل، مين قتل اكتر مين اقل هون القضاء يحكم".

وختمت حداد رسالتها بالقول "أنا مقتنعة انو نسبة تحقيق أهداف هالانتفاضة ضئيلة جدا جدا بس اوّل مرّة بحكي لانه اوّل مرّة بحسّ اللّبناني لبناني بده لبنان وعلمه العلم اللبناني وجيشه الجيش اللبناني. وسامحوني بحب لبنان، بحب شعبي اللبناني على اختلافه وما بحبن هني كلن... يعني كلن".

صباح الخير لبنان pic.twitter.com/UN0pi8DfHd

— Carla Haddad (@CarlaHad) October 23, 2019