توجّهت النجمة إليسا بالشكر إلى جميع الدول المتعاطفة والداعمة للبنان بعد انفجار مرفأ بيروت، وذلك في مداخلةٍ هاتفيّةٍ أجرتها مع برنامج "التاسعة" الّذي يقّدمه الإعلامي وائل الإبراشي على شاشة التلفزيون المصري.
ووصفت إليسا ما حصل في بيروت بعبارة "هيروشيما 2"، وتابعت: "نحنا بإيام الحرب ما عشنا اللي عشناه بتاريخ 4 آب. كرمال مين ماتوا كل هالعالم؟ كرمال ناس مخبايين نيترات الامونيوم بأهم مرفأ بلبنان، وما انهزّ شعرة من راس أي زعيم، صار ولائي لشعبي ولبلدي".
وبعد انقطاع الاتصال مع إليسا، عادت وأشارت إلى أن الطبقة السياسيّة الّتي تحكم لبنان هي أسوأ طبقة جاءت في لبنان، وأضافت: "أتوا بوزراء دمى وبالقوّة راحت الحكومة، بعد عنا رئيس الجمهورية وصهرو لرئيس الجمهورية وحزب الله وكل الزعماء اللي صرلن 30 سنة واللي مستعدين يدعسوا ع جثث العالم ت يبقوا.. كلن يعني كلن".
ودخلت الفنانة إليسا في نوبة من البكاء على الهواء قائلةً: "وقت شوف بنت عمرها 3 سنين ميتة أو شباب، شو ممكن قول قدّام هالشي لأنو أكبر من طاقة أي شخص بالعالم؟".
واعتذرت إليسا على الهواء عن عدم استكمال المداخلة بسبب البكاء خاتمةً بعبارة: "كلّ العالم بتعرف الشعب اللبناني شعب محبّ للحياة، مثقف وبيحب الفن والإبداع، ما بحياتو تعوّد على الذلّ اللي عم بيعيشو. حتى أنا بس شوف عم يجي مساعدات بقول كتّر خيرهم، بس المنظر انك تشوف ناس عم بيقدموا لناس مساعدات ع الكاميرا هيدا الشي مذلّ كمان".