اتصال فاجأ طارق سويد فأسرع الى المستشفى... من ينتظره في العناية الفائقة؟ (صورة)

شارك الإعلامي والممثل اللبناني طارق سويد محبيّه، قصّة موثّرة حصلت معه بعد تلقّيه اتصالاً هاتفياً مفاجئاً.

 

في التفاصيل، سرد سويد عبر انستغرام، كيف اتصّل به رقم مجهول وإذ بشاب يخبره أن شقيقه ويدعى جورج تعرّض لحادث خطير دخل على اثره إلى العناية المشددّة لافتاً الى أنه من أشدّ محبي سويد.

فكتب طارق سويد:" شب بقلي انو خيو بالمستشفى وعي بالعناية و سئل عني... ما استوعبت اول شي... قلي حلمو يشوفك اذا فيك".

وأضاف أنه لم يترددّ في الإسراع والذهاب إلى المستشفى لمقابلة الشاب، كاشفاً من خلال صورة أرفقها بالمنشور كيف تواصل معه من خلال الكتابة نظراً للمعدّات الطبية التي كان موصولاً بها جورج.

شارحاً:"وصلت عأوتيل ديو لبسوني الروب و دلوني كيف بدي روح... قلبي كان عم يدق بطريقة ما بعرفا من قبل.. فتت لقيت شب متل القمر عمرو ١٧ سنة... جورج... مع كل النباريش اللي بتمو و المكنات قدرت شوف بسمتو... ما قادر يحكي، طلب ورقة وقلم... وكتبلي كل اللي بقلبو".

وتابع:" غمرني عقد ما فيه غمرتو بقلبي و بكل روحي...وعدتو لما يضهر نروح نقضي نهار مع الحيوانات وعدتو روح لعندو عالبيت وقضي يومين عندو، قلتلو بحبك كتير قلتا وكتير كنت عانيها من قلبي.. بحبك يا جورج كتير".

كما دعا طارق سويد في نهاية المنشور كل متابعيه للصلاة على نية شفاء الشاب، متمنيّاً:" ما بدي شي بالـ ٢٠١٩ غير انو جورج يصير منيح لنفذ وعدي... صلو معي وكل واحد عطريقتو متل ما بصلي".

 

 

View this post on Instagram

 

دق تلفوني من يومين، بالعادة انا مش صحبة مع التلفون، ما بعرف ليش رديت.. شب بقلي انو خيو بالمستشفى وعي بالعناية و سئل عني... ما استوعبت اول شي... قلي حلمو يشوفك اذا فيك.. اكيد ما كان بدا اذا فيك، كان بدا قوم هلق تاع لهون... وصلت عأوتيل ديو، لبسوني الروب و دلوني كيف بدي روح.. قلبي كان عم يدق بطريقة ما بعرفا من قبل.. فتت، لقيت شب متل القمر عمرو ١٧ سنة، جورج.. مع كل النباريش اللي بتمو و المكنات، قدرت شوف بسمتو.. ما قادر يحكي، طلب ورقة و قلم... افتكرت بدو يكتبلي بحب تمثيلك، بحب برامجك، بحب كتاباتك، لاء لاء كتبلي كل اللي بقلبي.. هالقد بيعرفني و هالقد بيشبهني.. اول جملة كتبا، كتير بحب كيف بتعامل الحيوانات.. تاني جملة سئلني عن كلبتي كيفا و بالإسم، تالت جملة كانت، كيف كان نهار اللي ساعدت فيه المسنين المتروكين؟ .. و اخر شي كتبو.. بحبك كتير...طلب يفكولو ايدو التانية بحركة من راسو، و غمرني عقد ما فيه، غمرتو بقلبي و بكل روحي..وعدتو لما يضهر، نروح نقضي نهار مع الحيوانات، وعدتو روح لعندو عالبيت و قضي يومين عندو، قلتلو بحبك كتير قلتا و كتير كنت عانيها من قلبي.. بحبك يا جورج كتير... ما بدي شي بال ٢٠١٩ غير انو جورج يصير منيح لنفذ وعدي.. صلو معي و كل واحد عطريقتو متل ما بصلي.. صلو معي...

A post shared by Tarek Soueid (@tareksoueid) on Jan 12, 2019 at 1:08am PST