ودّعت الإعلاميّة ريما نجيم المخرج سيمون أسمر عبر أثير إذاعة صوت الغد ضمن برنامجها الصباحي "يا ريما" فقالت:
"الله معك يا أستاذ، سلّم على كل اللي سبقوك واللي صنعوا مجد التلفزيون ومجد الفن والنجومية اللي ما بتشبه أي نجوميّة بأي مطرح بالعالم".
وأضافت ريما نجيم "يكفيني أنّي عايشتك وعاصرتك وسهرت معك وحكينا سوا لساعات وتعلّمت منّك أشيا كتيرة وحاورتك لساعات إذاعية طويلة. وكنا سوا وبقينا سوا لآخر الايام نحكي عن كتير قصص بالحياة: عن النهايات والبدايات، عن الفن وعن الاغنية وعن الشهرة.. ومنّك كتير تعلّمت".
وكشفت ريما نجيم للمرة الأولى "شكراً أستاذ على كلّ كلمة حلوة قلتلّي اياها وعلى كل كلمة بشعة لأن ال ٢ علّموا فيي وال ٢ ساعدوني لإتقدّم بمطارح رغم إني كنت إزعل أوقات كتير!".
وتابعت شكرها بالقول "شكراً لأنك كنت بالوقت الأصعب بمسيرتي الإعلامية بالوقت اللي ما كنت أعرف من وين تجيني الضربات والإنتقادات وكنت تقلّي هيدا دليل إنك موجودة وناجحة".
وختمت ريما نجيم "كنت أركض لعندك باكية وشاكية وإرجع عم بضحك وواثقة بحالي أكتر بكتير".