أسبوع على رحيل زوجها.. مي مطر تفطر القلوب: "بثواني قلت يا عدرا...

2^min

بعد مرور أسبوع على وفاة لاعب الهومنتمن السابق جورج بدوي، أعربت زوجته الفنانة مي مطر عن حزنها الشديد في كلماتٍ تفطر القلوب.

في التفاصيل، كتبت الفنانة مي مطر "من جمعة، خسرت كل شي.. واكتشفت انو اللي كنت عايشتو حلم، كان كتير حلو ليكون حقيقة.. وكنت اسأل حالي، انا مين لاستاهل هيك شخص، هيك قلب، هيك حب! ليش تبدي كون هيك محظوظة بانسان عشقني وعشقتو اكتر من ما العقل بيتخيل.. عشت اجمل ايام حياتي، علّمتني الصبر، الحب، الحياة، كيف كون اقوى، كيف كون احسن".

وتابعت "متل اليوم كان الي يومين بنام بالسيارة وبفكر بيلّي صار السبت، كيف آخر لحظات كانوا بين ايديي. اتذكر كل كلمة قلتها، كيف بثواني قلت يا عدرا ١٠٠ مرة.. انا اللي كنت عيش من ورا ضحكتك وصوتك، اليوم الي جمعة ما سمعتك، ما غمرتك، ما طلعت بعيونك".

وتحدّثت مي عن ولديها التوأم فقالت "صرت عم بمشي واتخيلك وين ما كان، وشوفك بعيون احلى اتنين تركتلي ياهن.. يا امي شو بيشبهوك، مش متخيلي يكبروا بلاك، مظبوط حضل خبرهن عنك، بس الحكي مش متل الشوف يا أطيب وأحن بي. ندمانة انو السبت ما لحقت قلك بحبك بحبك بحبك. حرقتني يا قلبي، اشتقتلك".

وختمت مي مطر رسالتها بكلمة شكر وإعتذار فكتبت "شكراً لكل اللي وقفوا حدي وبعدن واقفين.. اهلي، اصحابي، الصحافة فرداً فرداً. وناس كتير ما بعرفها.. وبعتذر اذا بيّن مني اي شي غلط، عذري معي".

*حفاظاً على حقوق الملكية الفكرية يرجى عدم نسخ ما يزيد عن 20 في المئة من مضمون الخبر مع ذكر اسم موقع الـ LBCI الالكتروني وارفاقه برابط الخبر Hyperlink تحت طائلة الملاحقة القانونية