نشرت الممثلة ندى أبو فرحات صورة لها مع عبارة "صوت الموسيقى أعلى" رفضاً لقمع أهل الفن، وذلك في حفل يحمل شعار "القمع مش مشروع"، وأرفقته بمنشور لفت الأنظار.
في التفاصيل، كتبت ندى ابو فرحات "أنا إنسانة مؤمنة. بآمن بالانفتاح وحرية التعبير، بالعلم والتحضر، بالفن والجمال. ما بحب الارغيلة وتضيع الوقت، ما بحب الأغاني اللي ما بتحترم المرأة وبتتمسخر على حقوقا ويللي بيرقص عليا ٩٠% من اللبنانية رجال ونساء".
وتابعت ندى ابو فرحات "ما بحب اللي بيكب زبالتو عالطرقات والبحور وبيرجع بيصلي بالجوامع والكنايس. ما بحب اللي بخالف بالسواقة وبيعرض حياتي للخطر وحاطط رموز دينية داخل سيارتو. ما بحب الرصاص بالأفراح والأحزان لأن كمان بتعرض حياتي وحياة عيلتي للخطر".
وختمت ندى ابو فرحات صرختها بالقول "ما بنتمي لولا حزب. بدي كهربا ومي وضمان شيخوخة وطرقات آمنة ومتحضرة، بدي العلم يكون ببلاش والامان اولوية. بدي ابن الـ 18 ما ينحبس اذا تعاطى سيجارة حشيشة، وينكب بدالو كل اللي عم يتعاطوا فساد ونهب".